У Карэлічах прайшоў фестываль “Хрыстаславы-2024”, які аб’яднаў выхаванцаў і педагогаў нядзельных груп Карэліччыны.
На пачатку мерапрыемства начальнік аддзела адукацыі Карэліцкага райвыканкама Ірына Асташэвіч падзякавала святарам раёна за падтрымку ўстаноў адукацыі, павіншавала ўсіх прысутных з Каляднымі святамі і пажадала ўдзельнікам поспехаў.
Благачынны цэркваў Карэліцкай акругі, протаіерэй Мікалай Орса, адкрываючы фестываль, распавёў пра свята Нараджэння Хрыстова і пажадаў удзельнікам мерапрыемства міру і дабра, дабрабыту і моцнага здароўя.
Гледачы ў зале атрымлівалі асалоду ад калядных песень, якія славілі нараджэнне Збавіцеля, тэатралізаваных прадстаўленняў, расказваючых аб гэтай светлай падзеі і любві да блізкіх. На сцэну падымаліся дзеці, апранутыя ў касцюмы анёлаў, вешчуноў і святароў, якія дарылі ўсім гасцям свята добрую атмасферу.
Сяргей СТОЛЯР
Фота аўтара