“Канстытуцыя — Асноўны Закон Рэспублікі Беларусь” — пад такой назвай на базе Карэліцкага маладзёжнага цэнтра культуры 15 сакавіка прайшла дыялогавая пляцоўка. Гэта была сустрэча кіраўніцтва раёна з 30-гадовай рабочай моладдзю, членаў Савета рабочай моладзі і Маладзёжнага парламента.
Мадэратарам дыялогавай пляцоўкі выступіў начальнік аддзела ідэалагічнай работы і па справах моладзі Карэліцкага райвыканкама Генадзій Карпаленка. Спікерамі сустрэчы сталі намеснік старшыні Карэліцкага райвыканкама Яўген Чычкан, член Савета Рэспублікі Нацыянальнага сходу Рэспублікі Беларусь Эльвіра Сарока, начальнік аддзела эканомікі райвыканкама Таццяна Бусько, старшыня Ярэміцкага сельскага выканаўчага камітэта Сяргей Барычэўскі.
У фае цэнтра ўдзельнікаў мерапрыемства чакала кніжная выстава, арганізаваная УК “Карэліцкая раённая бібліятэка”, прысвечаная дзяржаўнаму святу, а таксама фотавыстава “Карэлічы: учора і сёння”, якую падрыхтавалі супрацоўнікі УК “Карэліцкі раённы краязнаўчы музей”.
Падчас дыялогу закранулі пытанні сацыяльна-эканамічнага развіцця Карэліцкага раёна, нагадалі змены заканадаўства, якія былі прынятыя на рэспубліканскім рэферэндуме ў лютым 2022 года. Таксама спыніліся на гістарычных аспектах фарміравання Канстытуцыі Рэспублікі Беларусь, удасканаленні сучаснай дзяржавы і грамадства, асновай чаго таксама з’яўляецца дадзены юрыдычны дакумент. Грамадзянскасць і патрыятызм моладзі на фоне барацьбы з сучаснымі выклікамі, фарміраванне грамадзянскай сталасці маладога пакалення – гэтыя тэмы таксама былі ў ліку ключавых. Сярод навацый, якія больш за ўсё цікавяць моладзь, – сям’я, мацярынства, бацькоўства і дзяцінства пад абаронай дзяржавы, рэалізацыя патэнцыялу моладзі ў інтарэсах усяго грамадства, захаванне гістарычнай памяці і патрыятызм.
Па словах спікераў сустрэчы, усе добра разумеюць, што ў свеце ідзе барацьба за розумы, і ў першую чаргу розумы моладзі. Таму палітыка нашай дзяржавы выбудаваная такім чынам, каб кожны грамадзянін быў задзейнічаны ў працы, накіраванай на фарміраванне грамадзянскай пазіцыі. І яна першапачаткова павінна грунтавацца на любові і павазе да сваёй краіны, народа.
– Вельмі важна сёння размаўляць з моладдзю аб Канстытуцыі, закладзеных у ёй асновах, і заканадаўстве ў цэлым, – адзначыла Эльвіра Сарока. – Маладыя людзі павінны разумець палітычную сістэму і грамадскае жыццё краіны, каб ведаць, у якім кірунку ім далей рухацца і будаваць сваю будучыню. Наша дзяржава заўсёды аказвала падтрымку моладзі, у тым ліку на заканадаўчым узроўні. Безумоўна, моладзі важна мець уяўленне аб тых людзях, якія гэтую ўладу прадстаўляюць, каб у далейшым мець магчымасць звярнуцца да іх па дапамогу.
Цікавую прэзентацыю “Беларусь – 30 гадоў па шляху развіцця” для ўдзельнікаў дыялогавай пляцоўкі падрыхтаваў навуковы супрацоўнік Карэліцкага раённага краязнаўчага музея Аляксей Караян. Музычнае прывітанне падарылі работнікі культуры.
Моладзь станоўча адгукнулася аб сустрэчы, назваўшы яе карысным ”лікбезам”.
Супрацоўнік Карэліцкага РАУС Глушчанка Марыя падзялілася:
-Дыялогавая пляцоўка прайшла на высокім узроўні. У зале сабралася моладзь з усяго рэгіёну, каб разам абмеркаваць і паразважаць, задаць хвалюючыя пытанні кіраўніцтву раёна пра важнасць Канстытуцыі ў жыцці кожнага. Думаю, што ўдзельнікі мерапрыемства, запрошаныя юнакі і дзяўчаты добра ўсведамляюць, што Асноўны Закон нашай краіны ўвабраў у сябе ўсё лепшае, традыцыі і пераемнасць. Ведаць яго абавязаны кожны грамадзянін. Калі ў 2021 годзе пачалася праца над папраўкамі ў Канстытуцыю, да гэтай работы актыўна далучылася моладзь, якая таксама ўносіла свае прапановы. Гэта сведчыць пра тое, што час ідзе, многае мяняецца, а наша Канстытуцыя, у тым ліку дзякуючы моладзі, працягвае быць сучаснай і актуальнай для кожнага пакалення.
Кацярына КУКАНАВА
Фота аўтара